Zomernieuws uit Zuid-Afrika

Desembermaand is komkommertyd ...  zo begint de Versindaba-nieuwsbrief van december, maand van de zomervakantie in Zuid-Afrika. Toch heeft Louis Esterhuizen interessant nieuws te melden:

• nieuwe vertalingen in de 'vertaalkamer' met een oproep om nog meer vertalingen in te zenden
• dichters mengen zich in het debat rond het aanslepende racisme in Zuid-Afrika
• Antjie Krog en Ronelda Kamfer komen in januari naar Den Haag
• I.M. Dennis Brutus (en een gedicht)
• studie rond poëzie en het Zuid-Afrikaanse landschap
• Versindaba wordt vanaf nu gesubsidieerd door het Fonds Neerlandistiek

Inderdaad is Desember in Suid-Afrika komkommertyd en met die meeste mense op somervakansie vir die Kers- en Nuwejaarsvieringe, geld dit net soveel vir die poësie en aktiwiteite daar rondom. Op die Versindaba-webblad was dit dus ook maar aan die stillerige kant. Bydraes het meestal oor die pasafgelope poësiefees, en die nagevolge daarvan, gehandel, met heelwat briewe wat vir die Brieweboks ontvang is. Dan het ons vertaalkamers intussen ook besonder mooi aangegroei. Gaan lees gerus die Afrikaanse gedigte wat na ander tale (waaronder Nederlands) vertaal is en op die webblad beskikbaar is. (Uiteraard is u ook welkom om u eie vertalings van Afrikaanse gedigte aan ons te stuur vir plasing. Dit is immers ons oogmerk om so ’n volledige databasis as moontlik tot stand te bring.) Gedigte uit die wêreldskat van die digkuns wat na Afrikaans vertaal is, kan hier gelees word.

Vervolgens, op sy blog het Charl-Pierr e Naudé ’n belangrike inskrywing geplaas in reaksie op die openbare debat oor voortslepende rassisme in Suid-Afrika. “Maar wat doen (Jonathan) Jansen wél reg? Beide hy én (Antjie) Krog vra vir ’n historiese analise van rassisme. Hulle sê: Só is ál manier waarop ons sal weet waarom rassisme in Suid-Afrika ná 20 jaar demokrasie steeds so sterk is.  Ons moet voortdurend kyk na waar ‘n bepaalde rassisme vandaan kom, om die redes sowel as die oplossings daarvoor te snap,” het hy geskryf. Hierop het Richard Jurgens, ’n Engelssprekende Suid-Afrikaanse skrywer wat tans in Amsterdam woon, reageer wat ’n stimulerende gesprek tot gevolg gehad het.

 

 Dan is ons in Suid-Afrika natuurlik ook verheug oor die feit dat beide Antjie Krog en Ronelda Kamfer aan die Winternachten op 14 Januaie in Den Haag gaan deelneem. Boonop gaan Antjie Krog die “Winternachtenlezing” lewer ... Inderdaad ’n uitsonderlike prestasie vir dié twee besonderse digters en ons hoop van harte dat u daar in die ander halfrond net so entoesiasties vir hulle sal hande klap soos wat ons dit hier in die suide doen. (As lusmaker kan u gerus ook Antjie Krog se pleidooi vir die poësie gaan lees wat hier op die webblad geplaas is.)

Hartseernuus is dat Suid-Afrika se immergeliefde Engelse digter, Dennis Brutus, die afgelope naweek oorlede is. Hy was ’n jarelange aktivis wat apartheid met woord en tand beveg het en selfs vir etlike jare tronkstraf moes verduur het. Ook het hy hom vir vele jare in selfopgelegde bannelingskap in die buiteland bevind. Hy is Saterdagaand tydens sy slaap oorlede in sy huis in Kaapstad. Minister Maite Nkoana-Mashabane se huldeblyk kan hier gelees word.

 
As persoonlike huldeblyk aan die ontslape digter voeg ons een van sy geleentheidsverse hierby in.

There will come a time we believe
When the shape of the planet
and the divisions of the land
Will be less important;
We will be caught in a glow of friendship
a red star of hope
will illuminate our lives
A star of hope
A star of joy
A star of freedom

-- Dennis Brutus, Caracas, October 18, 2008

 Vervolgens, ’n belangrike artikel wat die afgelope maand op LitNet Akademies verskyn het, is prof. Ena Jansen se besonderse artikel oor Ad Zuiderent wat as huldeblyk by die digter se 65ste verjaarsdag geplaas is. Daar word onder andere na sy gedig Telefoon uit een thuisland gekyk, met verwysing na Roman Jakobson se omskrywing van taalfunksies en geplaas in die konteks van pogings om deur poësie aan die Suid-Afrikaanse landskap uitdrukking te gee. Sy verwys onder andere ook na die gesprek tussen die Nederlandse en die Afrikaanse literêre sisteme.

Dan is dit ten slotte vir ons besonder aangenaam om bekend te kan maak dat die Versindaba-webblad voortaan deur die Fonds Neerlandistiek in Suid-Afrika befonds gaan word. Dit sal ons in staat stel om selfs nog nouer samewerking tussen ons en die Nederlands-Vlaamse digkunste te probeer vestig.

Daarom, besoek gerus ons webblad – Lees, raak opgewonde en neem deel!

’n Uiters voorspoedige 2010 word vir u en al u geliefdes toegewens.

 

Met vriendelke groete.

 

Louis Esterhuizen & Marlise Joubert

Aanhitsers: Versindaba