Derde nieuwsbrief Versindaba

Dit is alweer de derde Versindaba nieuwsbrief van onze Zuid-Afrikaanse collega Louis Esterhuizen. Oktobermaand is niet alleen de mooiste maand in Zuid-Afrika, het is blijkbaar ook de drukste maand, lees maar (ook Alfred Schaffer en Yves T'Sjoen zijn van de partij):

Oktobermaand word allerweë beskou as die “mooiste, mooiste maand” in Suid-Afrika; in hoofsaak vanweë C Louis Leipoldt (1880 – 1947) se klassieke vers Oktobermaand  wat reeds in 1921 verskyn het. Vir u leesplesier, die slotstrofes:

Wat gee ek om die winter?

Wat praat jy nou van Mei?

Wat skeel dit, as ons later

Weer donker dae kry?

Ek is nou in Oktober,

Die mooiste, mooiste maand,

Met elke dag so helder,

So pragtig elke aand!

 

Viooltjies in die voorhuis,

     Viooltjies blou en rooi!

Viooltjies orals op die veld,

     En orals, ai, so mooi!

Hartseernuus is dat IL de Villiers, een van ons mees geliefde en gewilde digters, aan die begin van Oktober oorlede is. Hy was 73 jaar oud. In sy lewe was IL de Villiers predikant, joernalis en digter. Uit sy pen het daar ses digbundels verskyn. Huldeblyke is op die Versindaba-webblad te lese, asook op LitNet.

Meer vreugdevolle nuus is dat Loftus Marais pas aangewys is as die wenner van die Ingrid Jonker-prys vir die beste debuutwerk met sy bundel Staan in die algemeen nader aan vensters (2008: Tafelberg). Dit is reeds die derde prys wat Marais met hierdie gedurfde bundel van hom verower. Ander pryse is die Eugène Marais-prys (wat hy met Rondelda S. Kamfer deel), asook die Universiteit van Johannesburg se prys vir beste debuutwerk. Ter illustrasie van sy digwerk plaas ek graag die gedig met die titel “Die digter as rockstar” hieronder. (Terloops, die verwysing na ‘n beiteltjie in die voorlaaste reël is ‘n direkte inspeling op NP Van Wyk Louw se beroemde vers “Die beiteljie”.)

 

Fok jou, ek pak sportstadions vol

Vir my flits paparazzi splitsekondes wit bladsye

Ek dra my punctuation as piercings

My woorde trash hotelkamers, fok jou

Woofers sidder jambes

En die groupies se sashimi-poesies drup vir my

Ek is die digter in ‘n studded leather broek

Ek breek my versreëls oor julle koppe soos guitars

Lighters swing op my sonnette

Fok julle almal

Gevuisde skares skreeu my koeplette

Daar’s stukke wallace stevens op my rug getatoeëer

Ek is die digter as rockstar

En kyk, nee lees, luister, dammit hóór:

Ék is nie ‘n beiteltjie nie

Ek is ‘n fokken lugdrukboor

 

Op die webblad was dit ook ‘n “mooiste, mooiste maand”. In navolging van die “Roots festival” waaroor ek in my vorige Nuusbrief geskryf het, het Charl-Pierre Naudé ‘n stuk in antwoord op Gerrit Brand en Neville Alexander se bydraes oor de posisie van Afrikaans in ‘n multi-linguale gemeenskap geplaas. Lees gerus ook Hein Willemse se lesing wat tydens die Roots festival gelewer is oor kreoolse Afrikaans. Nog ‘n belangrike plasing deur Charl-Pierre Naudé is ‘n stuk wat handel oor die belangrikheid van burgerlike ongehoorsaamheid. (Terloops, lees sommer ook Charl-Pierre Naudé se stuk oor hermetiese poësie en sy vertalings van gedigte deur Alfred Schaffer terwyl u op sy blogruimte is …)

Twee uiters opwindende projekte rondom die kwessie van die digkuns die afgelope maand, is ten eerste “Piemp” deur Thérèse Hulme. Sy is ‘n sosiale terapeut wat in die armste van arm gemeenskappe in die Wes-Kaap begin het om 13-jarige kinders te motiveer om deur die skryf van gedigte hul trauma’s en sosiale ontwrigting te verwoord. Lees gerus ook die onderhoud wat met Thérèse gevoer is. Nog ‘n opwindende projek is Maude Bekaert se Word(l)s-projek van gedigte wat in klip uitgekap word, waarby Ronel Nel betrokke was en waaroor sy verslag doen.

Ten slotte het Yves T’Sjoen, ons gewaardeer Vlaamse blogger, sy sendelingwerk voorgesit met uitnemende inskrywings oor die kwessie van vertaling en hertaling, asook die tye en swye van Raster as werksplek vir die literauur.

Inderdaad was Oktober ‘n bedrywige maand in die Afrikaanse lettere. Besoek dus gerus die Versindaba-webblad en verlustig u aan alles wat daar te lese is.

Vorige Versindaba nieuwsbrief.